Юбилей школы - МБОУ "Чакырская СОШ им.С.С.Яковлева - Эрилик Эристина"

Перейти к контенту

Главное меню:

Юбилей школы

Информационная безопасность
С.С.Яковлев-ЭриликЭристиин аатынан Чакыр орто оскуолатын
90 сыллаах үбүлүөйэ.

      Ахсынньы ый ахсыс күнүгэр биһиги билиибит кыһатын 90 сыллаах үбүлүөйүн үрдүк таһымнаахтык бэлиэтээтибит. Бу күн ааспыт кэмнэргэ үөрэммит выпусниктар, үлэлээн-хамсаан ааспыт үлэһиттэр тоҕуоруһа мустан астына-дуоһуйа дьоро күнү бэлиэтээтилэр.
        Чакырга  оскуола тутуллуута 1920 с. Г.С.Яковлев-Кыра Хабырыыс көҕүлээһининэн саҕаламмыта. Бу үтүө дьыала Гражданскай сэрии мэһэйдээн тохтоон хаалбыта. Сэрии кэнниттэн С.С.Яковлев-Эрилик Эристиин быраата саҕалаабыт дьыалатын тиһэҕэр тиэрдибитэ. Иннэ гынан, 1928 с. Чакырбытыгар саҥа оскуола аана тэлэччи арыллыбыта!
   Үбүлүөй күн сарсыардата нэһилиэкпит ытык алгысчыта Н.Н. Григорьев алгыһынан бэрт өрө көтөҕүллүүлээхтик саҕаламмыта. Салгыы үөрэнээччилэргэ, кэлбит ыалдьыттарга анаан өрөгөйдөөх линейка буолбута. Оҕолор ыалдьыттарга урукку кэми санатан, октябреноктар, пионердар, комсомоллар буолан киирбиттэрэ. Линейка кульминационнай чааһынан билигин үөрэнэ сылдьар оҕолорго, урукку кэмҥэ үөрэммит, үлэлээбит ыалдьыттарга аналлаах тоҕус миэтэрэлээх минньигэс тордунан күндүлээһин буолбута. Бу түгэҥҥэ оҕолор үөрэн чаҕылыспыт харахтара, ыалдьыттар истиҥ мичээрдэрэ оскуолабыт 90 сылын бэлиэтиир күммүтүгэр история буолан хааллаҕа...Кэлбит ыалдьыттар уонна үөрэнээччилэр кылаас чаастара олус интэриэһинэйдик ааспыттара. Ыалдьыттар оҕолорго үөрэммит сылларын кэпсээбиттэрэ, ханна да сырытталлар, оскуолатааҕы кэмнэрин, үөрэммит сылларын умнубаттарын эппиттэрэ. Салгыы  кэлбит ыалдьыттарга үөрэнээччилэрбит Макарова Аня, Филиппова Анжелика, Петров Кэскил Эрилик аатынан литературнай-мемориальнай музей экспонаттарын, Эриликкэ аналлаах истиэндэлэри сырдаппыттар. Улуу убайбытын, Эрилик Эристиини, убаастыырбытын, таптыырбытын, умнубаппытын  биллэрэн, кини пааматынньыгар сибэкки дьөрбөтүн ууран сүгүрүйбүппүт.  
     Эбиэттэн киэһэ өрөгөйдөөх чааспыт саҕаламмыта. Бу чааспытын оҕолуун, үлэһиттэрдиин – бары тутуспутунан арыйбыппыт биир туһунан үтүө өйдөбүл буоллаҕа. Салгыы оскуолабыт дириэктэрэ, Александра Васильевна Неустроева, 5 сыллаах үлэтин түмүгүн дакылааттаабыта. Хайа баҕарар тэрилтэ историятын, билиҥҥи кэмин ситимниир кэтит далаһата, үйэлээх бэлэҕэ – кинигэ буолар. Үбүлүөйдээх  күнүнэн эҕэрдэлээн туран, Александра Васильевна үлэһиттэргэ Чакыр оскуолатын туһунан кинигэни бэлэх ууммута.
        Салгыы ыҥырыылаах ыалдьыттар – “Чурапчы улууһа” МТ баһылыга А.Т.Ноговицын, улуус мунньаҕын бэрэссэдээтэлэ А.А.Захаров, Ил Түмэн депутата П.П.Пинигин, Ил Түмэн Судаарыстыбаннай мунньаҕын ыччат дьыалаларыгар, физическай культураҕа уонна спорка сис кэмитиэтин бэрэссэдээтэлэ М.Д.Гуляев, СР үөрэҕин уонна наукатын миниистирин бастакы солбуйааччыта И.П.Любимова, психологическай киин дириэктэрэ К.К.Чичигинаров, Чурапчы улууһун үөрэҕин управлениетын начальнига Т.В.Павлова, начальник солбуйааччыта И.И.Чичигинаров Дьокуускайдааҕы “Чакыр” түмсүү бэрэссэдээтэлэ М.А.Кириллин, Чурапчытааҕы түмсүү бэрэстэбиитэлэ М.Н.Матвеева бэйэлэрин эҕэрдэлэрин, таһаарыылаах учууталларга наҕараадаларын туттарбыттара. Суруйааччылар Сэмэн Тумат, А.Кузьмина, Эрилик Эристиин сыдьаана Л.Е.Аргунова кэлэн ыалдьыттаабыттара, эҕэрдэ тылларын эппиттэрэ. Н.В.Уарова бэрэссэдээтэллээх Чурапчы улууһун дириэктэрдэрин ассоциацията Чурапчы гимнин ыллаан дуораһыппыттара көрүөххэ астык буолла.
   Бэлиэ күммүт  үөрэнээччилэр эҕэрдэ кэнсиэрдэринэн, выпусниктар көрсүһүүлэринэн түмүктэммитэ. Ыраахтан-чугастан кэлбит, урукку кэмҥэ үөрэммит, үлэлээбит ытык-мааны дьоммут кэлэн эҕэрдэ тылларын эппиттэрэ, алгыстарын анаабыттара туохха да тэҥнэммэт күндү бэлэх буолар.


Кэс тылга өрүүтүн оскуола ааттаннын!

Уруйдан, билиибит биһигэ!

Назад к содержимому | Назад к главному меню