Чакырга – хайыһар үрдүгэр! - Новости - МБОУ "Чакырская СОШ им.С.С.Яковлева - Эрилик Эристина"

Перейти к контенту

Главное меню:

Чакырга – хайыһар үрдүгэр!

МБОУ "Чакырская СОШ им.С.С.Яковлева - Эрилик Эристина"
Опубликовано вход Новость ·
  2021 сылга Чурапчы улууһун  үрдүнэн  биллэриллибит Доруобуйа сылыгар аналлаах тэрээһиннэр С.С.Яковлев-Эрилик Эристиин аатынан Чакыр орто оскуолатыгар утумнаахтык ыытылла тураллар.  Ол курдук, оскуолаҕа спорт хайысхатын өрө тутааччылар – Николаева А.К., Саввинов Д.И., физкультура учууталлара,   Адамов С.К., ОБЖ учуутала олус интэриэһинэй спорт декадатын тэрийэн ыыттылар.
  Биир улахан тэрээһининэн  муус устар 15 күнүгэр  шорт-трек уонна хайыһар күрэҕэ буолла. Былырыыҥҥы дьылга муус устар ортотугар уу уста сытар эбит буоллаҕына, быйыл үллүктээх хаар түһэн спортсменнары үөртэ-көтүттэ. Сылаас сааскы салгын, чаҕылхай күн, халыҥ хаар – бу күн, дьэ, табыллыаҕын табылынна!
  Шорт-трек диэн көрүҥ кэнники кэмҥэ оҕо-ыччат олус сэҥээрэр спордун көрүҥэ буолан  турар. Килэриччи оҥоһуллубут  катокка оҕолор сүһүөҕүнэн арахсан,  хаҥкынан  куоталастылар. Сүрдээх интэриэһинэй, киһи болҕомтотун тардар,ыһыылаах-хаһыылаах күрэхтэһии буолан  биэрдэ. Бу күрэххэ Марков Ваня, 9-с кылаас үөрэнээччитэ,  имигэс хамсаныытынан, түргэн туттунуутунан дьон-сэргэ биһирэбилин ылыаҕын ылла.
  Саамай кэтэһиилээх, саамай долгутуулаах  күрэх – кылаастар икки ардыларыгар хайыһарынан эстафета -  эмиэ олус үчүгэйдик ааста. Балаһыанньа быһыытынан, хайыһар эстафетатыгар  кылаастан биир улахан киһи (төрөппүт эбэтэр кылаас салайааччыта) уонна биир кыыс, биир уол хамаанда туруордулар. Кылаас уопсайа 1 км. кругу эргийэн кэлиэхтээх. Манна көһүннэ – кыайыыга дьулуур, бэйэҕэ эрэл, кыах-уох!
  Эстафета5а биһирэбиллээҕэ диэн хайыһарынан профессиональнайдык дьарыктаммат дьон, төрөппүттэр,  хайыһар үрдүгэр турбуттара буолар.   Саас Чакыр нэһилиэгэр бааза арыллан,  дьон-сэргэ чэбдик салгыҥҥа хайыһардаан, астына-дуоһуйа сынньанна. Кыралыын-улаханныын, эдэрдиин-эмэнниин иллэҥ кэмнэригэр  баазаҕа кэлэн, хайыһардаан дайан эттиин-хаанныын, өйдүүн-санаалыын сынньанан тарҕаһаллар.  Бу буолар – хайыһар спордун популяризацията! Үтүө тэрээһин түмүгэр,  кыайыылаахтар түөстэригэр мэтээл кэтэн үөрэн-көтөн тарҕастылар. Физкультура учууталлара маннык күрэхтэһиини үгэскэ кубулутар баҕа санааларын эттилэр.
  Санатар буоллахха, улуустааҕы комплекснай хайыһар күрэ5ин  түмүгүнэн, Чакыр орто оскуолатын хамаандата кыра оскуолаларга 1-кы миэстэ буолары ситиспитэ. Бу эмиэ күүстээх дьарыктан кэлэр ситиһии буолар. Оҕолорбут, инники кэскилбит, бастакы миэстэни ылары  ситиспиттэрэ – Чакыр нэһилиэгэр хайыһар көрүҥэ сөргөхсүтүллэн эрэрин бэлиэтэ.




Назад к содержимому | Назад к главному меню